ngerepas ayem utan

Kami belime sekawan ari ya gi gutong ruyong di kampong Bangka.Rencana nek ngesat kayu bulet tuk pundok.Pundok tu kelak nek dipakai ngumpul ngumpul.Muet rencana kek lain lain e.Pukok e seger la.Pundok ya numpang di tanah Bik Tini di Kampong Bukit Merapen .Cuma numpang ukan diberik.Jadi men bik Tini nek makai tanah ya..dek tau ngapalah.......name ge tanah urang .

Kepala rumbong kami biase lah Dul Keripot .Urang ganteng kata mak e .Kate Dul kami dek usah mawek lauk.Kelak pacaklah ngerepas ayam utan.Dipanggang nyamen asa e.Tinggal cecel kek sambel butul.Lah siip....

Mulailah kami berangket ke utan nek ngesat kayu.Segale pekakas dibawek.Pareng,Kapak ,Gergaji.Cuma Dul laen yang dibawek e...Dul mawek isok dapuk mak e..la karat ulik....ya lah hal e yang muet kami gerigit....

Jukad :'la nua ki ne yak.Pacak ape ki kek isok karat ya...nek besunat ok.'

Ziky :'tah lah ok .Budak sikok ne .Kelak men dikate budu..bejik ulik.

Aris : 'tuk apa ya yak isok karat ya..

Dul : 'Nek mutong ayem ..sapa tau perepas kita kenak "

kawan2 ; ohhhhhh.......cem yaaa (mirip bunyi riu kumpang )

Kami la mulai ngesat kayu .Dul kek ko masang perepas luk.Pinter imang Dul muet perepas.Ade lime ikok perepas kami pasang di utan ya.........La udeh ngesat kayu kami ge istirahat.Ko kek Dul ningok perepas yang kami pasang di utan.Imang bener ada due ikok ayem utan tegantung di perepas.Ngeleper keni kenu.Kami tangkep langsung kami putong.Ku hiran..kata Dul ayem utan..tapi yang nyangkut ayem jago.Kelak punyak urang udeh e.....pacak jadi hal .Ayem dipanggang.Nayamen umun asa e.Jukad kek Aris sampai karep jadi e...eekkk....eek...bedehek due urang ya.Ati ati jok....dek kawa kedadak ayem....

Dek lama ben udeh maken ade mang Tuha tegupoh gupoh mereh kami.
Mang Tuha ''ade dek ikak nengong ayem jagok ko..ku la sekaput nyarik e...warna e item mirah..panjeng kitok e...

Dalem ati ko sama kek ayem yang kami perepas.Kelak ayaem ya yang dimaksod.Ku nyuet Dul.Dul dek retak aben.Teneng bae. Dek lama udeh ya ade karoh man Tuha.

Mang Tuha ; 'nI..BULU E....weu la diputong.Ade bekas dareh e.Mulai curiga mang Tuha kek kami .Ikak lauk ape tadi ?

Dul ;ayem utan mang,dapet ngerepas........tu bekas bulu e...men amang nek agik ade ni...dek abis kami makan e....Mang Tuha ningok bulu ayem..mulai nya meraning...

Mang Tuha ;'ikak rupe e...yang ngambik ayem ko..ayo ikak genti...genti..men dek ku lapor kek hansip kampong

Dul ;mang..tu ayem utan.ukan ayem amang.Tanyak lah kek kawan kami ne...kami ngerepas lem utan ne......masak mang kami maling ayem amang..Dek sesuai agik macem e...

Mang Tuha dek nek damai aben.Kami dibawek ke ketue kampung.Kami disidang.Dul teneng bae...mese ge imang dapet di utan.Ukan di kampong.Kami diadu mang Tuha.Mang Tuha akhir e kalah.Sual e dek tebukti men ayem tu ayem nya .Kami dek tau aben kisah e....ayam mang Tuha ape kan ......imang dapet e di utan .Anye gara gata dapet di utan...udeh tu ade ulik bukti perepas e....kami dek jadi diukum.Mang Tuha abis dikeruce ketue kampong.Men nek miara ayem dibuet kandang e..ukan dilepas cem ya bai........sapa kek tau...ayem ya ade dek yang empuk...men lem utan..reti e ayam utan...biar sebener e ayam jagok.........
(Dul ngigel ketabe.....Masak ge ikak dek tau ayem utan ape ayem jago.Yang kite putong tadi ayem jago dari utan...ayem utan ya jembang urang nyebut e......Dul Dul..jadi imang ayem Mang Tuha yang kite putong tadi......keliwat ki ne Dul.....sude ne betubat rasul kami dek nek agik ngikut ngerepas ayem utan........tubaaaatttttttt)



Salam
Andi As