yak andi "kue celepon dikira dareh"

"kue celepon dikera dareh"
oleh yak andi as
2015


Ukan Darah..celepon pecah
Malem ya ade acara nganggong di surau kami.Pas malem tu malem Maulud.Lah jadi peradat kami di kampong men ade Maulud harus nganggong.Mawek pemaken .Uges dulang kek tudung saji.Acara udeh sembayang Isa.Jadi dek nganggu sembayang jemaah di surau ya.
Ingen e kami men ade acara nganggong.Kawan kawan la ngumpol pek adep surau.Kami dek ikot sembayang.Dek kawa nganggu urang.Sual e men ikot sembayang kami begagit teros.Cuit gamit keni kenu...kadeng ketabe....
Udeh sembayang Isa.urang nyuson dulang yang berisik bemacem pemaken.Baris adep pastilah ketue surau kek penguros.Baris seteros e jemaah.Terakhir baru budak budak.Tu ge ade yang jage e.Malem ya kami dijage Mang Buyong kek Mang Rebaen.Tekenal garang e amang due ya...takot kami .Dak kawa belampu kening ne.....
Mulailah ketue surau mimpin tahlil...ramai bunyi e..cem kumbang di bateng karet .Entah ape penyebab e..lampu pek surau mati.Gelep bener...tapi tahlil jalan teros.Dalem gelap ku tingok ade yang nyingkap dulang.Udeh tu ditarok pek sungkok e.......Nyer..lampo nyale...........
Hiran ku kek Sumin .Ade dareh ngalir di kening mang buyong.
Sumin : "Jok..kening Mang Buyong bedareh.Ka tengong ge.."
Kate ko :'Ukan jok....laen warna e...mirah agak item"
'hemmm.....jangen inger..urang agik Tahlil ,"segak mang buyung.Kami diem.Tapi malerlah Sumin ngumong.
Sumin :'Dareh jok...."
Ku jawab dalem gaya tahlil..'Ukan darah..celepon pecah....ukan darah celepon pecah "
Mang Buyong uman e ingah ape yang ku ngumong.Nya ngeraba kenig e....Ya ampon,imang celepon pecah.Rupee..pas mati lampo tadi mang Buyong ,ngebunyik celepon pek sungkok e....nyangkak e bueh...dek tau e celepon......lebeb.pecah ulik celepon e....malu e mang Buyong kek kami bedue..."Awas men ikak madeh kek ketue surau..kubimbet bilong ikak....
Akhir e malam nganggong ya..kami yang paling banyek dapet pemaken.Mang Buyong yang merik e.Kami tarok di kain sarong.Ukan maen seneng e.....sejalen jalen kami ketabe...'ukan darah..celepon pecah...ukan darah celepon pecah...."hehehe.....
Sebile agik ok nganggong ne....ku nek mawek sumpit puron mak ko tuk uges pemaken......Hehe jangen ikak turot ok pegawe kami..cukoplah kami,ikak jangen...malu.....sampai belau ninggal...Mang Buyong baik kek ko.Maklom ade rahasia....

salam ANDI AS